ഉപജില്ലാ കലോത്സവത്തില്‍ ഉത്സാഹപൂര്‍വ്വം...

ദൃശ്യ-മാപ്പിളപ്പാട്ട്

സ്നേഹ,ശാലു,മാളവിക,മനീഷ,സത്യവതി,അര്‍ഷ,ദൃശ്യ-സംഘഗാനം

 ഈ വര്‍ഷത്തെ ബേക്കല്‍ ഉപജില്ലാ സ്കൂള്‍ കലോത്സവം നവംബര്‍ 16 ,21  22  23  24 തീയ്യതികളിലായി ഉദുമ ഗവ.ഹയര്‍ സെക്കണ്ടറി സ്കൂളില്‍ വെച്ച് നടന്നു.പതിവുപോലെ എല്‍.പി.വിഭാഗത്തിലെ കുട്ടികള്‍ക്ക് മത്സരിക്കാവുന്ന പരമാവധി ഇനങ്ങളില്‍ ഞങ്ങളുടെ കുഞ്ഞുങ്ങള്‍ മത്സരിക്കാന്‍ തീരുമാനിച്ചു. അധ്യാപികമാര്‍ തന്നെ പരിശീലകരായി..കൂട്ടുകാര്‍ക്ക് മുമ്പില്‍ പരിപാടികള്‍ അവതരിപ്പിച്ച് സഭാകമ്പം മാറ്റുവാനുള്ള അവസരങ്ങളും കുട്ടികള്‍ക്ക് നല്‍കി. എല്ലാ മേളകളും ഏതാണ്ട് ഒരേ സമയത്ത്   ആയതിനാല്‍ പരിശീലനത്തിന് വളരെ കുറച്ചു സമയമേ കിട്ടിയിരുന്നുള്ളൂ..മാത്രമല്ല,കഴിഞ്ഞവര്‍ഷത്തെ അപേക്ഷിച്ച് പാട്ട് പാടാനും മറ്റും കഴിവുള്ള കുട്ടികളും കുറവായിരുന്നു..അതിനാല്‍ പല മത്സരങ്ങളും 'ആമയും മുയലും'തമ്മിലുള്ള മത്സരമായിരിക്കുമെന്ന് ഉറപ്പ്‌! പങ്കെടുക്കുക എന്നതാണല്ലോ വിജയിക്കുന്നതിനേക്കാള്‍ പ്രധാനം.കുട്ടികള്‍ക്ക് കിട്ടുന്ന അവസരമല്ലേ,നടക്കട്ടെ...അത്രയേ കരുതിയുള്ളൂ...കഥാ കഥനം,പദ്യം ചൊല്ലല്‍,ലളിതഗാനം,മാപ്പിളപ്പാട്ട്,പ്രസംഗം,മോണോ ആക്ട്,കടംകഥ,ചിത്രരചന-പെന്‍സില്‍,ചിത്രരചന-ജലച്ചായം എന്നീ വ്യക്തിഗത ഇനങ്ങളിലും സംഘഗാനം,ദേശഭക്തിഗാനം 

കഥാ കഥനം-ജനി

എന്നീ ഗ്രൂപ്പിനങ്ങളിലുമാണ്‌   കുട്ടികള്‍ മത്സരിക്കാന്‍ പേര് നല്‍കിയത്.ഇതില്‍  മോണോ ആക്ട് ഒഴികെ എല്ലാ ഇനങ്ങളിലും പങ്കെടുക്കുകയും ചെയ്തു..രണ്ടിനങ്ങളില്‍ ഗ്രേഡുകള്‍ ഒന്നും ലഭിച്ചില്ല.മൂന്നിനങ്ങളില്‍ സി ഗ്രേഡും,അഞ്ചിനങ്ങളില്‍ ബി ഗ്രേഡും നേടാന്‍ ആയതു തന്നെ ഞങ്ങളെ സംബന്ധി ച്ചിടത്തോളം വലിയ കാര്യമാണ് .57 വിദ്യാലയങ്ങളാണ് എല്‍.പി.വിഭാഗത്തില്‍ മത്സരിക്കാനായി ഉപജില്ലയില്‍ ഉള്ളത്. 

പദ്യം ചൊല്ലല്‍-അര്‍ഷ

മത്സര ഇനങ്ങള്‍ എല്ലാം പൂര്‍ത്തിയായപ്പോള്‍ 44   പോയിന്റുമായി   അംബിക എ.എല്‍.പി.സ്കൂള്‍, ഉദുമ  ഒന്നാം സ്ഥാനവും ,37 പോയിന്റു വീതം നേടി ജി.എല്‍.പി.സ്കൂള്‍ തിരുവക്കോളി,ജി.യു.പി സ്കൂള്‍ പുല്ലൂര്‍ എന്നിവ രണ്ടാം സ്ഥാനവും ,36 പോയിന്റുകളോടെ  ബാര ജി.യു.പി.സ്കൂള്‍  മൂന്നാം സ്ഥാനവും നേടി മേളയിലെ ചാമ്പ്യന്‍മാരായി.(ഇതില്‍ പുല്ലൂര്‍ ഒഴികെയുള്ള മൂന്ന് സ്കൂളുകളും ഞങ്ങളുടെ പഞ്ചായത്തായ ഉദുമയില്‍ ആണെന്നതില്‍ ഞങ്ങളും അഭിമാനിക്കുന്നു...അവര്‍ക്ക് ആയിരമായിരം അഭിനന്ദനങ്ങള്‍!) 57 വിദ്യാലയങ്ങളുടെ കൂട്ടത്തില്‍ 18 പോയിന്റുകളോടെ പതിനെട്ടാം സ്ഥാനത്താണ്  ഞങ്ങളുടെ വിദ്യാലയമായ ബേക്കല്‍ ജി.എഫ്.എല്‍.പി.എസ് എന്നത് അഭിമാനാര്‍ഹമായ നേട്ടമായിത്തന്നെ ഞങ്ങള്‍ വിലയിരുത്തുന്നു.കാരണം 'കൊമ്പന്‍ സ്കൂളുകള്‍' പലതും ഞങ്ങളെക്കാള്‍ എത്രയോ പിന്നിലാണ്!  

പ്രസംഗം-ഷിബിന്‍

............36  കുട്ടികള്‍ മത്സരിച്ച ലളിതഗാനത്തില്‍ 6 പേര്‍ 'എ' ഗ്രേഡ് നേടിയപ്പോള്‍ ഏഴാം സ്ഥാനത്തെത്തിയ 'ശാലു'വിന് നേരിയ മാര്‍ക്കിന്റെ വ്യത്യാസത്തിലാണ് 'എ' ഗ്രേഡ് നഷ്ടമായത്.44  കുട്ടികള്‍ പങ്കെടുത്ത കഥാ കഥനത്തില്‍ ആറു  കുട്ടികള്‍ക്ക് എ ഗ്രേഡ് ലഭിച്ചപ്പോള്‍ ബി ഗ്രേഡോടെ പത്താം സ്ഥാനത്തെത്തിയ 'ജനി' നന്നായിത്തന്നെ കഥ പറഞ്ഞു.37 പേര്‍ മാറ്റുരച്ച മാപ്പിളപ്പാട്ട് മത്സരത്തില്‍ പത്തു പേര്‍ക്കായിരുന്നു എ ഗ്രേഡ്..

ദേശഭക്തിഗാനം-ശാലുവും സംഘവും

ശാലു-ലളിതഗാനം

പതിനൊന്നാം സ്ഥാനത്തെത്തിയ ദൃശ്യയ്ക്ക് ബി.ഗ്രേഡു കൊണ്ടു തൃപ്തിപ്പെടേണ്ടി വന്നു..സംഘഗാനത്തിന്റെ സ്ഥിതിയും ഇതു തന്നെയായിരുന്നു..മത്സരിച്ച് ഗ്രേഡുകള്‍ നേടിയത് 29  ടീമുകള്‍,ഇതില്‍ പത്തു പേര്‍ക്ക് എ ഗ്രേഡ്..ബി ഗ്രേഡുമായി പതിനൊന്നാമത് ഞങ്ങളുടെ ടീം!.............കുട്ടികളുടെ മൊത്തം  പ്രകടനത്തില്‍ സംതൃപ്തിയുണ്ടെങ്കിലും  അല്‍പ്പം കൂടി ശ്രദ്ധിച്ചിരുന്നെങ്കില്‍   മൂന്നിനങ്ങളി ലെങ്കിലും 'എ' ഗ്രേഡ് നേടാനാകുമായിരുന്നു   എന്നോര്‍ക്കുമ്പോള്‍ ചെറിയൊരു നിരാശ ഇല്ലാതില്ല..'പരാജയം വിജയത്തിലേക്കുള്ള ചവിട്ടുപടിയാണല്ലോ',അടുത്തവര്‍ഷ മാകട്ടെ,നോക്കാം ...

   29  ടീമുകള്‍ മത്സരിച്ച ദേശഭക്തി ഗാനത്തില്‍ രണ്ടു ടീമുകള്‍ക്ക് മാത്രമാണ് വിധികര്‍ത്താക്കള്‍ 'എ' ഗ്രേഡു നല്‍കിയത്!അഞ്ചു ടീമുകള്‍ക്ക് 'ബി' ഗ്രേഡും,ഞങ്ങളുടെ ടീം ഉള്‍പ്പെടെ ബാക്കിയുള്ള 22  ടീമുകള്‍ക്ക് സി ഗ്രേഡും...ഇത്ര പിശുക്ക് കാണിക്കണോ കൊച്ചു കുട്ടികളോട്... ഉപജില്ലാതലത്തിനപ്പുറം മത്സരമോ,ഗ്രേസ് മാര്‍ക്കിനായുള്ള അഭ്യാസമോ ഒന്നുമില്ലാത്ത ഈ കുഞ്ഞുങ്ങള്‍ക്ക്‌ അവരുടെ തലത്തില്‍ നിന്നുകൊണ്ട് വിലയിരുത്തി ഗ്രേഡുകള്‍ നല്‍കി പ്രോത്സാഹിപ്പിച്ചാല്‍ എന്താ കുഴപ്പം?      

''ഉപജില്ലയിലെ ശാസ്ത്രമേളയില്‍ നമ്മുടെ സ്കൂളിന് ഒന്നാം സ്ഥാനം!''

 ''നാട്ടുകാരേ കേട്ടോളൂ...
  ഉപജില്ലയിലെ ശാസ്ത്രമേളയില്‍ 
  നമ്മുടെ സ്കൂളിന് ഒന്നാം സ്ഥാനം!
  ഗണിത മേളയില്‍ രണ്ടാം സ്ഥാനം,
  പ്രവൃത്തിപരിചയ മേളയിലും 
  ഒന്നും രണ്ടും സമ്മാനങ്ങള്‍ 
  അപ്,അപ്, ജി.എഫ്.എല്‍.പി 
  വിജയിച്ചേ,വിജയിച്ചേ,
  ജി.എഫ്.എല്‍.പി.വിജയിച്ചേ..''

        ബേക്കല്‍ ഉപജില്ലാ  ശാസ്ത്ര മേളയില്‍ ഞങ്ങളുടെ സ്കൂളിന് ആദ്യമായി കിട്ടിയ ചാമ്പ്യന്‍ഷിപ്പ്!അധ്യാപകരുടെയും കുട്ടികളുടെയും ആഹ്ലാദം, മുഴുവന്‍ നാട്ടുകാരിലേക്കും എത്താന്‍ അധികം സമയം വേണ്ടി വന്നില്ല.സ്കൂള്‍ അസംബ്ലി കഴിഞ്ഞയുടനെ നാടു ചുറ്റി ഒരു ആഹ്ലാദപ്രകടനം..കുട്ടികളുടെ ആവേശത്തോടെയുള്ള   മുദ്രാവാക്യം വിളി  കേട്ടില്ലേ?കടപ്പുറത്തെ കൊച്ചു കുടിലുകളില്‍ നിന്നും മക്കളുടെ ജാഥകാണാന്‍ രക്ഷിതാക്കള്‍ ഒടിയെത്തുകയായി..... അത് കണ്ടപ്പോള്‍ കുട്ടികളുടെ ആവേശം ഇരട്ടിയായി..മുദ്രാവാക്യം വിളിയുടെ ശക്തി കൂടി...ചിലര്‍ കാര്യമറിയാതെ പകച്ച നില്‍ക്കുകയാണ്..''എന്താ മാഷേ,കാര്യം?''തിരക്കിയവരോടൊക്കെ ഞാന്‍ കാര്യം പറഞ്ഞു..സംഗതി പിടി കിട്ടിയപ്പോള്‍ അവര്‍ക്കും സന്തോഷം..''നമ്മുടെ മക്കള്‍ ഉഷാറാക്കിയല്ലോ   ''ചിലരുടെ കമന്റ് .. ''പണ്ടത്തെപ്പോലെയൊന്നുംഅല്ല,   ഇപ്പം എല്ലാ പരിപാടിക്കും കുട്ട്യോള് പോണ്‌ണ്ട്..സമ്മാനോം 
 
കിട്ടുന്നുണ്ട്..നല്ല കാര്യല്ലേ അത്  ...''ആളുകളുടെ സംസാരം തുടര്‍ന്നുകൊണ്ടേയിരുന്നു......ഈ നല്ല വാക്കുകള്‍ തന്നെയാണ് ഞങ്ങളുടെ പ്രചോദനം.'കടപ്പുറത്തെ സ്കൂളിലെ പിള്ളേര് പഠിക്കില്ല' എന്നു പറഞ്ഞു നടന്നിരുന്ന   ചില പുത്തന്‍ പണക്കാര്‍ പ്രതാപം കാട്ടാനായി മക്കളെ കോട്ടും സൂട്ടു മിടീച്ച്,  കാശ് പിടുങ്ങുന്ന സ്കൂളുകളിലേക്ക് അയച്ചിരുന്നല്ലോ..ഇനി കടലില്‍ പണിക്കു പോകുന്ന സാധാരണ തൊഴിലാളികള്‍ തന്നെ അവരോടു പരഞ്ഞുകൊള്ളും..'ഞങ്ങളുടെ മക്കളും ഒട്ടും മോശമല്ലെന്ന്'. 
       ...ഉപജില്ലാതല മേളകളിലെല്ലാം കുട്ടികളുടെ പൂര്‍ണ പങ്കാളിത്തം ഉറപ്പിക്കാന്‍ കുറച്ചു വര്‍ഷങ്ങളായി ഞങ്ങള്‍ ശ്രദ്ധിക്കാറുണ്ടായിരുന്നു..എല്ലായ്പ്പോഴും കൊച്ചു കൊച്ചു സമ്മാനങ്ങളും കിട്ടിയിരുന്നു..ഞങ്ങള്‍ അത്രയേ പ്രതീക്ഷിച്ചിരുന്നുമുള്ളു..മൂന്നു വര്‍ഷം മുമ്പ് ഗണിത മേളയില്‍ കിട്ടിയ രണ്ടാം സ്ഥാന മായിരുന്നു ഇതുനു മിമ്പു കിട്ടിയ ഏറ്റവും വലിയ സമ്മാനം..   ഇപ്പോള്‍ അത് ഒന്നാം സ്ഥാനത്തോളം എത്തിയിരിക്കുന്നു!തീര്‍ച്ചയായും കൂട്ടായ്മ യുടെ വിജയം തന്നെയാണിത്.മേളകളുടെ   കാര്യത്തില്‍ മാത്രമല്ല,  അക്കാദമിക മികവിലേക്ക് വിദ്യാലയത്തെ നയിക്കുന്നതിനും അധ്യാപകരുടെയും,കുട്ടികളുടെയും,രക്ഷിതാക്കളുടെയും, പൊതു സമൂഹത്തിന്റെയും ഈ കൂട്ടായ്മ കാരണമായിട്ടുണ്ട്.
 

         ...എല്‍.പി.വിഭാഗം ശാസ്ത്രമേളയില്‍ സയന്‍സ് ചാര്‍ട്ടിനു 'എ' ഗ്രേഡോടെ ഒന്നാം സ്ഥാനവും(ഷിബിന്‍&ശാലു)),ലഘു പരീക്ഷണത്തിന് രണ്ടാം സ്ഥാനവും(രാഹുല്‍&അര്‍ഷ-'എ'ഗ്രേഡ്‌ ) നേടിയതു   കൊ ണ്ടാണ് ഞങ്ങള്‍ക്ക് ഇത്തവണ ചാമ്പ്യന്‍ഷിപ്പ് കിട്ടിയത്.  
     സാമൂഹ്യശാസ്ത്രമേളയിലും ചാര്‍ട്ട് വിഭാഗത്തില്‍ ഞങ്ങള്‍ക്കു തന്നെയായിരുന്നു ഒന്നാം സ്ഥാനം.(സത്യവതി&മാളവിക)

 ഗണിതമേളയില്‍ പസിലിന് രണ്ടാം സ്ഥാനവും(ശരത്.യു) ജ്യോമെട്രിക് ചാര്‍ട്ടിനു മൂന്നാം സ്ഥാനവും (ജനു.ജെ)  നേടി ഓവറോള്‍ മൂന്നാം സ്ഥാനം കരസ്ഥമാക്കാനും ഞങ്ങള്‍ക്കായി.
                 പ്രവൃത്തി പരിചയ മേളയില്‍ എട്ടിനങ്ങളിലാണ്  മത്സരിച്ചത്.ഇതില്‍ ബുക്ക് ബൈന്റിങ്ങിനു ഒന്നാം സ്ഥാനവും(റോഷന്‍ കെ.കെ)വെജിറ്റബിള്‍ പ്രിന്റിങ്ങിനു രണ്ടാം സ്ഥാനവും(അഭിനന്ദ്.ആര്‍) 'എ'  ഗ്രേഡോടെ  

 തന്നെ കരസ്ഥമാക്കാനായി.മറ്റു നാലിനങ്ങളില്‍ 'സി'.ഗ്രേഡാണ്  കിട്ടിയതെങ്കിലും ഞങ്ങള്‍ സംതൃപ്തരാണ്.വരും വര്‍ഷം കൂടുതല്‍ ആത്മ വിശ്വാസത്തോടെ മേളകളില്‍ പങ്കെടുക്കാന്‍ ഈ വിജയം ഞങ്ങള്‍ക്ക് കരുത്തു നല്‍കുന്നു. 
      ......വനസംരക്ഷണത്തിന്റെ   പ്രാധാന്യം വ്യക്തമാക്കുന്ന സയന്‍സ് ചാര്‍ട്ടും,റോഡപകട   
ങ്ങളുടെ കാരണങ്ങളും ,പരിഹാര നിര്‍ദേശങ്ങളും പ്രതിപാദിച്ച സാമൂഹ്യശാസ്ത്ര ചാര്‍ട്ടും ഏവരുടെയു ശ്രദ്ധ പിടിച്ചു പറ്റിയിരുന്നു.

          കാഞ്ഞങ്ങാട് വെച്ച് നടന്ന റവന്യൂ ജില്ലാ ശാസ്ത്രോല്‍സവത്തില്‍  സയന്‍സ് ചാര്‍ട്ട്,ലഘു പരീക്ഷണം,സാമൂഹ്യശാസ്ത്രം ചാര്‍ട്ട്,ഗണിത പസില്‍,വെജിറ്റബിള്‍ പ്രിന്റിംഗ്,ബുക്ക് ബൈന്റിംഗ്എന്നീ ഇനങ്ങളില്‍ പങ്കെടുക്കുന്നതിനുള്ള അവസരവും ഞങ്ങളുടെ കുട്ടികള്‍ക്ക് ലഭിച്ചു.ഇതില്‍ സയന്‍സ് ചാര്‍ട്ടിനു 'എ' ഗ്രേഡോടെ നാലാം സ്ഥാനംലഭിച്ചു.വമ്പന്‍ സ്കൂളുകള്‍ക്കൊപ്പം മത്സരിച്ച്  വെജിറ്റബിള്‍ പ്രിന്റിങ്ങിനു 'എ' ഗ്രേഡും സാമൂഹ്യശാസ്ത്രം ചാര്‍ട്ടിനു 'ബി' ഗ്രേഡും ലഭിക്കാനായത് ഞങ്ങളെ സംബന്ധിച്ച് വലിയ നേട്ടം തന്നെയാണ്........

'കുട്ടികളുടെ അവകാശങ്ങളെക്കുറിച്ച് രക്ഷിതാക്കളോട്'-പാരന്റിംഗ് 2011

ഗ്രാമ പഞ്ചായത്ത് മെമ്പര്‍ ശോഭ കരുണാകരന്‍ 'പാരന്റിംഗ്' ഉദ്ഘാടനം ചെയ്യുന്നു.

കുട്ടികളുടെ അവകാശങ്ങളെക്കുറിച്ച് ശ്രദ്ധാ പൂര്‍വ്വം കേള്‍ക്കുന്ന രക്ഷിതാക്കള്‍

രക്ഷിതാക്കളോടു പറയുന്നതിന് മുമ്പ് കുട്ടികളോട് കുറച്ചു കാര്യങ്ങള്‍-ബി.ആര്‍.സി.ട്രെയിനര്‍ രാജീവന്‍ മാഷിന്റെ  
ശിശുദിന സന്ദേശം

രക്ഷിതാക്കള്‍ക്കും കൂട്ടുകാര്‍ക്കും മുമ്പില്‍ ലഘു പരീക്ഷണവുമായി ശാസ്ത്ര മേളയിലെ വിജയികളായ രാഹുല്‍,അര്‍ഷ

ഊതാതെ വീര്‍ക്കുന്ന ബലൂണ്‍!ഇത് കൊള്ളാമല്ലോ...കൂട്ടുകാര്‍ക്ക് അത്ഭുതം!

പ്രവൃത്തി പരിചയ മേളയില്‍ വെച്ച് കുട്ടികള്‍  നിര്‍മ്മിച്ച സാധനങ്ങള്‍ നോക്കുകയാണ് അമ്മമാര്‍ 

നമ്മുടെ മക്കള്‍ക്ക് ഇതൊക്കെ അറിയാം,അല്ലെ!മദര്‍ പി.ടി.എ പ്രസിണ്ട് നിഷയ്ക്ക് അഭിമാനം.

നാലാം തരത്തിലെ റോഷന് ബുക്ക് ബൈന്ടിങ്ങില്‍ ഒന്നാ സ്ഥാനം നേടിക്കൊടുത്തു ഈ ബുക്കുകള്‍..

മുത്തുകള്‍ കൊണ്ടുള്ള ഉല്‍പ്പന്നങ്ങള്‍,എംബ്രോയിഡറി,എല്ലാം കുട്ടികളുടെ സൃഷ്ടികള്‍ തന്നെ.

ദിനാചരണങ്ങളുടെ   ഭാഗമായി സംഘടിപ്പിച്ച വിവിധ മത്സര വിജയികള്‍ക്ക് 'OUR KASARGODE'   സ്പോണ്‍സര്‍  ചെയ്ത സമ്മാനങ്ങള്‍ ഗ്രാമ പഞ്ചായത്ത് മെമ്പര്‍ നല്‍കുന്നു.

പി.ടി. പ്രസിഡണ്ട് ശശികുമാര്‍ ചടങ്ങില്‍ അധ്യക്ഷത വഹിച്ചു.

ശിശു ദിനത്തില്‍ കുട്ടികള്‍ക്ക് മധുരം നല്‍കിയതും 'OUR  KASARGOD'  തന്നെ.

സര്‍വശിക്ഷ അഭിയാന്റെ ആഭിമുഖ്യത്തില്‍ നവംബര്‍ പതിനാലിന് സ്കൂളില്‍ സംഘടിപ്പിച്ച രക്ഷാ കര്‍തൃ ബോധവല്‍ക്കരണ പരിപാടി-പാരന്റിംഗ് 2011 -പലതുകൊണ്ടും വേറിട്ട ഒരനുഭവമായി.രണ്ടു മണിക്ക് നിശ്ചയിച്ച പരിപാടിയില്‍ രക്ഷിതാക്കള്‍ എത്തിത്തുടങ്ങിയതെ യുള്ളൂ...കാത്തിരുന്നു സമയം കളയാതെ കുട്ടികളോട് കൊച്ചു വര്‍ത്തമാനം തുടങ്ങി,ബി.ആര്‍.സി ട്രെയിനറായ രാജീവന്‍ മാഷ്‌.'ഒരച്ഛന്‍ മകള്‍ക്കയച്ച കത്തുകള്‍'പരിചയപ്പെടുത്തി ക്കൊണ്ടു    ചാച്ചാജി അനുസ്മരണം നടത്തുകയും അതിലൂടെ കുട്ടികളുടെ അവകാശങ്ങളെ ക്കുറിച്ച് കുട്ടികളെ ഓര്‍മ്മ പ്പെടുത്തുകയും ചെയ്തു ,രാജീവന്‍ മാഷ്‌.അപ്പോഴേക്കും രക്ഷിതാക്കള്‍ ഏതാണ്ട് എത്തിക്കഴിഞ്ഞു.കുട്ടികളുടെ അവകാശ നിഷേധം കാണിക്കുന്ന വീഡിയോ ക്ലിപ്പിംഗ് പ്രദര്‍ശിപ്പിച്ചു കൊണ്ട് പ്രധാനാധ്യാപകന്‍ നാരായണന്‍ മാഷ്‌ ചര്‍ച്ചയ്ക്കു തുടക്കമിട്ടു.കുട്ടികളുടെ അവകാശം മുതിര്‍ന്നവരുടെ ഔദാര്യമല്ല,മരിച്ചു നിയമപരമായ അവകാശം തന്നെയാണെന്നും,അത് നിഷേധിക്കുന്നത് ശിക്ഷാര്‍ഹമായ കുറ്റമാണെന്നും തുടര്‍ ചര്‍ച്ചയിലൂടെ രക്ഷിതാക്കള്‍ക്ക് ബോധ്യപ്പെട്ടു.
         കുട്ടികള്‍ക്കുള്ള അവകാശങ്ങളില്‍ പ്രധാനപ്പെട്ട വിദ്യാഭ്യാസത്തിനുള്ള അവകാശത്തെക്കുറിച്ചുഇന്ത്യാ സര്‍ക്കാര്‍ പ്രഖ്യാപിച്ച നിയമത്തെക്കുറിച്ചും,അതിനനുസൃതമായി കേരളത്തില്‍ നടപ്പിലാക്കുന്ന വിദ്യാഭ്യാസ അവകാശ നിയമത്തെ ക്കുറിച്ചും വിശദമായിത്തന്നെ രക്ഷിതാക്കള്‍ക്ക് പറഞ്ഞുകൊടുത്തു.മെച്ചപ്പെട്ട വിദ്യാഭ്യാസം കുട്ടികള്‍ക്ക് ഉറപ്പു വരുത്തണമെങ്കില്‍ 
വിദ്യാലയവും രക്ഷിതാവും എങ്ങനെ മാറണം എന്നാ കാര്യവും ചര്‍ച്ച ചെയ്തു.കുട്ടികളുടെ അവകാശങ്ങള്‍ സംരക്ഷിക്കുന്നതിനായി വിദ്യാലയത്തില്‍ നടപ്പിലാക്കിയ പരിപാടികള്‍ ഒന്നൊന്നായി ഹെഡ് മാസ്ടര്‍ വിശദീകരിച്ചു.
                    നമ്മുടെ വിദ്യാലയപ്രവര്‍ത്തനത്തെ താല്‍പ്പര്യപൂര്‍വ്വം നോക്കിക്കാണുന്ന 'OUR KASARGOD'എന്ന കൂട്ടായ്മയിലെ സുഹൃത്തുക്കള്‍ കുട്ടികള്‍ക്കായി നല്‍കിയ സമ്മാനത്തെ ക്കുറിച്ച് ഏറെ സന്തോഷത്തോടെയാണ് രക്ഷിതാക്കളെ അറിയിച്ചത്..കൂട്ടായ്മയിലെ അംഗമായ 'ബഷീര്‍ കാഞ്ഞങ്ങാട്' കുറച്ചു ദിവസങ്ങള്‍ക്കു മുമ്പ് സ്കൂള്‍ സന്ദര്‍ശിക്കുക യുണ്ടായി.പിന്നീട് മറ്റൊരംഗമായ 'മുജീബ് കൈന്ദര്‍' ഗള്‍ഫില്‍ നിന്ന് നാട്ടിലെത്തിയപ്പോള്‍ അവരുടെ സ്നേഹ സമ്മാനമായി 3000 രൂപ ഹെഡ് മാഷെ ഏല്‍പ്പിക്കുകയായിരുന്നു!വിവിധ മത്സരങ്ങളില്‍ വിജയിച്ച കുട്ടികള്‍ക്ക് സമ്മാനങ്ങള്‍ നല്‍കാനും,ഇന്ന് ശിശു ദിനത്തില്‍ മുഴുവന്‍ കുട്ടികള്‍ക്കും മധുരം നല്‍കാനുമാണ് ആ തുക ആദ്യമായി നാം ഉപയോഗിക്കുന്നതെന്നും മാഷ്‌ സൂചിപ്പിച്ചു.ബാക്കി തുക ഈ വര്‍ഷത്തെ ഉപജില്ലാതല മേളകളിലെ വിജയികളെ അനുമോദിക്കുന്നതിനും,എല്‍.എസ്‌.എസ്‌.പരീക്ഷയ്ക്ക് തയ്യാറെടുക്കുന്ന   കുട്ടികള്‍ക്ക് പരിശീലനം
നല്‍കുന്നതിനുമായി മാറ്റി വെയ്ക്കും..തുടര്‍ന്നു മത്സര വിജയികള്‍ക്കുള്ള സമ്മാനദാനം ഗ്രാമ പഞ്ചായത്ത് മെമ്പര്‍ നിര്‍വഹിച്ചു.
       ഉപജില്ലാ ശാസ്ത്രോത്സവത്തില്‍ സമ്മാനാര്‍ഹമായ ഇനങ്ങള്‍ കുട്ടികള്‍ രക്ഷിതാക്കള്‍ക്ക് മുമ്പില്‍ അവതരിപ്പിച്ചപ്പോള്‍ അവര്‍ക്ക് അത്ഭുതവും അഭിമാനവും!കുട്ടികള്‍ തയ്യാറാക്കിയ വിവിധ ഉല്‍പ്പന്നങ്ങളുടെ പ്രദര്‍ശനവും രക്ഷിതാക്കല്‍ക്കായി ഒരുക്കിയിരുന്നു.
         യാന്ത്രികമായ ബോധവല്‍ക്കരണ ക്ലാസല്ല,മറിച്ച്' ഗുണമേന്മയുള്ള വിദ്യാഭ്യാസം' എന്ന കുട്ടികളുടെ അവകാശം   യാഥാര്‍ത്യമാകുന്നതിന്റെ നേരനുഭവം തന്നെയായിരുന്നു ഇത്തവണത്തെ പാരന്റിംഗ്.ഈയവസരത്തില്‍ ഞങ്ങളുടെ കുഞ്ഞുങ്ങള്‍ക്ക്‌ പ്രോത്സാഹനവുമായി വന്ന 'ഔര്‍ കാസര്‍ഗോഡ്‌' നും സമ്മാനം നേരിട്ട് എത്തിച്ച മുജീബ് കൈന്ദറിനും കടലിന്റെ മക്കളുടെ ആയിരമായിരം നന്ദി!

നാടന്‍ കളികളും,കളിപ്പാട്ടങ്ങളുമായി രണ്ടാം ക്ലാസ്സിലെ കുട്ടികള്‍..കളിയിലും കാണും കാര്യം!

പശുവും പുലിയും കളി

''ഇതെന്തു ചങ്ങല?''
 ''ഇരുമ്പിന്‍ ചങ്ങല.''
 ''എവിടുന്നു കിട്ടി?''
 ''കോട്ടേന്നു കിട്ടി.''
 ''ആരു തന്നു?''
 ''മൂപ്പന്‍ തന്നു.''
 ''എന്തിനു തന്നു?''
 ''നിന്നെ പൂട്ടാന്‍.''  

ഹാവൂ..രക്ഷപ്പെട്ടു!ഇനി പശുവിനെ പിടിക്കാം

                 ........'പശുവും പുലിയും' കളിയില്‍ ലയിച്ചിരിക്കുകയാണ് എന്റെ കുട്ടികള്‍.പശുവിനെ പിടിക്കാന്‍  വലയില്‍ കയറിയ പുലിയെ പുറത്തുവിടാതെ നോക്കുകയാണ് ഓരോരുത്തരും..പുലി വലയ്ക്ക് ചുറ്റും നടന്ന് ചോദിക്കുന്ന ചോദ്യങ്ങള്‍ക്ക് കുട്ടികള്‍ താളത്തില്‍ ഉത്തരം പറയുന്നുമുണ്ട്...........അതാ,പുലി ഒരു   ചങ്ങലക്കണ്ണി പൊട്ടിച്ചു പുറത്തു ചാടിയിരിക്കുന്നു!ഒട്ടും താമസിച്ചില്ല,പശു വലയ്ക്കുള്ളില്‍ കയറി...പശുവിനെ പിടിക്കുന്നതു വരെ കളി തുടര്‍ന്നു...പിന്നീട് കുട്ടികളെ മാറ്റി വീണ്ടും കളി ആരംഭിച്ചു...
കുറച്ചു കഴിഞ്ഞു എല്ലാവരും  ക്ലാസ്സുമുറിയിലേക്ക്....  
                     ഇപ്പോള്‍ നടത്തിയ കളിയെക്കുറിച്ച് കുട്ടികളെ ക്കൊണ്ടു പറയിപ്പിച്ചു...പിന്നീട് ഓരോരുത്തരും സ്വന്തമായി കളി വിവരണം എഴിതിത്തയ്യാറാക്കി.ഗ്രൂപ്പായി ഇരുന്ന്  പരസ്പരം വിലയിരുത്തി.മെച്ചപ്പെട്ടത് കണ്ടെത്തി.(സ്വയം വിലയിരുത്തലിനുള്ള അവസരവും ഇത് വഴി ലഭിച്ചു.)ഗ്രൂപ്പിന്റെതായ ഒരു വിവരണവും തയ്യാറാക്കി.ഓരോ ഗ്രൂപ്പിന്റെയും   അവതരണത്തിനു ശേഷം ഞാന്‍ തയ്യാറാക്കിയ വിവരണം ബിഗ്‌ സ്ക്രീനില്‍ പ്രദര്‍ശിപ്പിച്ചു.ചര്‍ച്ചയിലൂടെ തങ്ങളുടെ വിവരണത്തില്‍ വരു ത്തേണ്ടുന്ന മാറ്റങ്ങള്‍ എന്തൊക്കെയാണെന്ന് കുട്ടികള്‍ക്ക് ബോധ്യപ്പെട്ടു.തുടര്‍ന്നു ഞാന്‍ നല്‍കിയ വര്‍ക്ക് ഷീറ്റില്‍ വ്യക്തിഗതമായി വിവരണം തയ്യാറാക്കിയപ്പോള്‍ തെറ്റു പറ്റാതിരിക്കാന്‍ അവര്‍ പരമാവധി ശ്രദ്ധിച്ചു...  ഇങ്ങനെയല്ലേ കളി കാര്യമാകേണ്ടത്?

കൂടില്ലാത്തണ്ണാന്‍ കളിയില്‍ നിന്ന്

             'അക്കുത്തിക്കുത്താനവരമ്പത്ത്' എന്ന പാഠവുമായി ബന്ധപ്പെട്ട് തുടക്കത്തില്‍ നല്‍കിയ പ്രവര്‍ത്തനമാണിത്.തുടര്‍ന്ന് പാഠത്തില്‍ സൂചിപ്പിച്ച 'കൂടില്ലാത്തണ്ണാന്‍'കളിയും ക്ലാസ്സുമുറിക്ക്  
പുറത്തുപോയി കളിച്ചു...ഇതുപോലുള്ള ധാരാളം നാടന്‍ കളികളുടെ പേരുകളും കളി രീതിയും കുട്ടികള്‍ കണ്ടെത്തി.എല്ലാ നാട്ടിലും ഉള്ള കളികള്‍ ഒരുപോലെയല്ല എന്ന കണ്ടെത്തലും കുട്ടികള്‍ നടത്തി.

കൂടില്ലാത്തണ്ണാനേ  വാ.. വാ.. വാ ...

 

ആകെ എത്രയെണ്ണം ഉണ്ട്?

 നാടന്‍ കളികളുമായി ബന്ധപ്പെട്ട കളിയുപ കരണങ്ങളും മറ്റു കളിപ്പാട്ടങ്ങളും ഉണ്ടാക്കുന്ന വിധം മുതിര്‍ന്നവരോട് ചോദിച്ചു മനസ്സിലാക്കിയാണ് പിറ്റേ ദിവസം എല്ലാവരും ക്ലാസ്സില്‍ എത്തിയത്.കുറേപ്പേര്‍ തെങ്ങോല കൊണ്ടുള്ള കളിപ്പാട്ടങ്ങളും കൊണ്ടുവന്നു.ഓല കൊണ്ടുവന്ന കുട്ടികള്‍ കളിപ്പാട്ടങ്ങള്‍ ഉണ്ടാക്കുന്ന വിധം മറ്റുള്ളവര്‍ക്ക് കാണിച്ചു കൊടുത്തു.ക്ലാസ്സില്‍ നിന്ന് ഉണ്ടാക്കിയതും കൊണ്ടു വന്നതുമായ ഓലക്കളിപ്പാട്ടങ്ങളുടെ ഒരു പ്രദര്‍ശനവും ക്ലാസ്സില്‍ നടത്തി.വാച്ച്,മോതിരം,മാല,കണ്ണട,പാമ്പ്,പാവ,പന്ത്,പീപ്പി,പമ്പരം,തുടങ്ങി എന്തെല്ലാം കളിപ്പാട്ടങ്ങള്‍!ഒന്നിനും കാശ് കൊടുക്കേണ്ട!ഇഷ്ടം പോലെ കളിക്കാം,പൊട്ടിപ്പോയാല്‍ ആരും ചീത്ത പറയില്ല!പണം കൊടുക്കാതെ കിട്ടുന്ന, പാഴ്വസ്തുക്കള്‍ കൊണ്ടു ഉണ്ടാക്കാവുന്ന, മറ്റു കളിപ്പാട്ടങ്ങളെ ക്കുറിച്ചും കുട്ടികള്‍ക്കറിയാം...തീപ്പെട്ടി വണ്ടി,പ്ലാവിലത്തൊപ്പി,  കയില്‍,പാള വണ്ടി,ഉജാലക്കിലുക്ക്,തീപ്പെട്ടിത്തോക്ക്,മുഖംമൂടി..ഇങ്ങനെ പോകുന്നു ലിസ്റ്റ്......ചിലതൊക്കെ കുട്ടികള്‍ പിന്നീട് കൊണ്ടുവന്നു....നിര്‍മ്മാണ രീതി പറഞ്ഞു..എഴുതി..

നോക്കാം..ആരാ ആദ്യം ഉണ്ടാക്കുക?

   
                                                       വില കൊടുത്തു വാങ്ങുന്നവ,സ്വന്തമായി നിര്‍മ്മിക്കുന്നവ,ശേഖരിക്കുന്നവ(മഞ്ചാടി,വളപ്പൊട്ടുകള്‍,കല്ലുകള്‍,പുളിങ്കുരു,തീപ്പെട്ടിക്കൂട്...)എന്നിങ്ങനെ കളിപ്പാട്ടങ്ങളെ തരംതിരിക്കാ മെന്നും അവര്‍ മനസ്സിലാക്കി .   ഇങ്ങനെയുള്ള കളിപ്പാട്ടങ്ങളെല്ലാം ശേഖരിച്ച് ക്ലാസ്സില്‍ ഒരു കളിപ്പാട്ടക്കട ഒരുക്കാനും കുട്ടികള്‍ക്കായി.കടയില്‍ നിന്ന് സാധനങ്ങള്‍ വാങ്ങുന്നതുമായി ബാബ്ധപ്പെട്ട ഗണിതക്രിയകള്‍ ഏറെ താല്‍പ്പര്യത്തോടെയാണ്   അവര്‍ ചെയ്തത്..        
       പുസ്തകത്തില്‍ കൊടുത്ത കുഴിക്കല്ലുകളി ക്ലാസ്സ് മുറിയില്‍ വെച്ച് കളിച്ചപ്പോള്‍ അതില്‍ പങ്കെടുക്കാന്‍ എല്ലാവര്‍ക്കും താല്‍പ്പര്യം.രണ്ടു മുതല്‍ നാല് വരെ കുട്ടികളാണ് ഒരു കളിയില്‍ പങ്കെടുത്തത്..മൂന്നു തവണ കളിക്കണം...ഓരോ തവണ കളി കഴിയുമ്പോഴും ഗ്രൂപ്പിലെ അംഗങ്ങള്‍ക്ക് കിട്ടിയ കല്ലുകളുടെ എണ്ണം ഓരോരുത്തരും നോട്ടു ബുക്കില്‍ എഴുതി.മൂന്നു കളിയും കഴിയുമ്പോള്‍ ആര്‍ക്കാണോ കൂടുതല്‍ കല്ല്‌ കിട്ടിയത് അയാളാണ് വിജയി..വിജയിയെ കണ്ടെത്തണമെങ്കില്‍ മൂന്നു സംഖ്യകളുടെ സങ്കലനം കുട്ടികള്‍ പഠിച്ചേ പറ്റൂ..അതുതന്നെയാണ് ഇവിടെ കളിയിലെ കാര്യവും! 

കുഴിക്കല്ലുകളി (കാടി കളി )

ക്ലാസ്സില്‍ ഒരുക്കിയ കളിപ്പാട്ടക്കട

ഇതുണ്ടാക്കാന്‍ ആര്‍ക്കാ അറിയാത്തെ?

 

കളിപ്പാട്ട പ്രദര്‍ശനത്തില്‍ നിന്ന്

 

'എന്റെ വിമാനം തന്നെ വലുത്!മാമന്‍ ദുബായീന്ന് കൊണ്ടു വന്നതാ'..

ഇനി എഴുതിയാലോ?

തെറ്റാതെ എഴുതാന്‍ നോക്കാം..

എന്റെ നാട്ടിലെ കളിപ്പാട്ടങ്ങളുടെ പേര് ഞാനും എഴുതട്ടെ.

ഞങ്ങള്‍ക്ക് ഇത്രയേ അറിയൂ..

പാവ ഡാന്‍സ്‌ കളിക്കുന്നത് കാണണോ?ഇതാ,കണ്ടോളൂ...ഞാന്‍ ഉണ്ടാക്കീതാ